Deputeti i Partisë Demokratike të Kosovës (PDK), Bekim Haxhiu, ka thënë se para zgjedhjeve LV-ja e LDK-ja vet proklamoheshin si ‘koalicioni i shpresës’, ndërsa pas zgjedhjeve doli të jetë koalicion i kazinove, kontrabandës e mashtrimit, që në brezin kufitar me Serbinë mbylli shkollat e hapi kazinotë.

Ky reagim i Haxhiut, vjen pas aksionit të policisë në Karaçevë.

“Aksioni i Policisë së Kosovës në Karaçevë menjëherë pas interpelancës se ministrit Agim Veliu në Kuvendin e Kosovës, argumenton më së miri se prapa kazinove në Karaçevë ka qëndruar klasa politike e lidhur me pushtetin e pas 6 tetorit 2019. Sikur LV-ja e LDK-ja të mos përplaseshin mes vete për ‘mustaqe e pafytyrësi’, sigurisht se puna e kazinove në Karaçevë do të vazhdonte pa pengesë, ashtu siç funksionuan deri më tani në Qeverinë Kurti e Hoti për muaj të tërë”, ka shkruar Haxhiu në llogarinë e vet në “Facebook”.

Ai ka shtuar se pas zgjedhjeve të 6 tetorit 2019, Karaçeva është shndërruar në oazë të krimit, bixhozit e kontrabandës.

“Komuna e Dardanës/Kamenicës që udhëhiqet nga kryetari Qëndron Kastrati, i cili fitoj votat si kandidat i LV-së për kryetar komune, në brezin kufitar me Serbinë ka mbyllur shkollat dhe njëkohësisht nuk ka ndaluar ndërtimin dhe funksionimin e Kazinove në fshatin Karaçevë. Qytetarët duan ta dinë: Pse pasi fitoj LV-ja në Dardanë/Kamenicë dhe në nivel të Kosovës, lulëzuan kazinotë në fshatin Karaçevë që ndodhet në brezin kufitar me Serbinë? Pse komuna e Dardanës/Kamenicës lejoj mbylljen e shkollave në brezin kufitar me Serbinë dhe nuk ndaloj ndërtimin e Kazinove në Karaçevë? Objektet e kazinove atje nuk u ndërtuan brenda natës, pse nuk pat reagim të institucioneve lokale e as qendrore? Funksionimi i kazinove në Karaçevë ishte i njohur për të gjithë, atëherë pse Qeveria Kurti dhe Hoti lejuan funksionimin e tyre pa pengesë gjatë kësaj kohe!?”, ka shkruar deputeti Haxhiu.

(M.Q / Epoka e re)