Kryetari i Komunës së Gjilanit, Lutfi Haziri, ka pritur në takim një delegacion zviceran të kryesuar nga Daniel Wafler, deputet i Parlamentit të Cyrihut, i cili shoqërohej nga Karl Kupper, profesor në shkollën e Agrobiznesit Strickhot të Cyrih, Zija Shabani, afarist dhe Florina Wafler, bashkëpunëtore.

Në këtë takim kanë marrë pjesë edhe drejtorët komunalë, Ramiz Ramadani e Valbona Tahiri, sikurse edhe drejtori i shkollës së mesme të agrobiznesit  “Arbëria”, Xhelal Jetishi.

“I falënderoj shumë për vizitën në Gjilan. Vizita ka të bëj me mbështetjen ndaj Gjilanit dhe regjionit tonë. Në fokus të bashkëpunimit tonë është shkolla e mesme e agrobiznesit ‘Arbëria’. Drejtoria e Bujqësisë dhe ajo e Zhvillimit Ekonomik do të angazhohen sa më shumë që ky program të jetë në fokus në mënyrë që fëmijët, nxënësit e studentët, ta shohin shkollën e agrobiznesit si derën kryesore për punësim në të ardhmen”, ka deklaruar kryetari Haziri, pas takimit. Haziri ka thënë se agrobiznesi dhe bujqësia janë dera kryesore që në të ardhmen e shohin zhvillimin lokal ekonomik. “Qëllimi është që shkolla ‘Arbëria’ të bëhet atraktive për mësimdhënësit dhe nxënësit, sikurse shkolla e pasdites për nevoja të fermerëve, për rritjen e produktivitetit dhe nxjerrjen e produkteve në tregun evropianë”, ka deklaruar ai.

Ndërsa Daniel Wafler, deputet i Parlamentit të Cyrihut, ka thënë se kanë ardhur me delegacionin zviceranë për të ndihmuar sistemin e arsimit, përkatësisht shkollën e mesme agrobiznesit. “Ideja është që atë që e kemi në Zvicër, pra përvojën, ta bartim në Gjilan, në sistemin e arsimit. Do ta krijojmë një bashkëpunim të fortë. Përvoja jonë do t’ju ndihmojë që ta krijojmë në agrokulturë të fortë e me sukses”, ka thënë Wafleri.

Delegacioni zviceran ka vizituar edhe dy brendet e njohura të Anamoravës, “Lura” dhe “Moea”, të cilët kanë parë nga afër punën që bëhet aty.