Kryetari i Komunës së Gjilanit, Lutfi Haziri, ka thënë se gjilanasit janë duke kaluar ditë të zeza pas tragjedisë së familjes Haliti, e cila ka humbur tre anëtarë në Shqipëri,  të cilët dyshohet se janë helmuar. Këto komente Haziri i ka bërë në konferencën për medie, duke shtuar se më 7 maj ishte njoftuar për gjendjen e rënduar të kësaj familje.

“Unë jam njoftuar për gjendjen e rënduar të kësaj familjeje më 7 maj. Menjëherë kemi shprehur interesimin dhe komunikimin drejtpërdrejt edhe përmes ambasadës së Republikës së Shqipërisë. Fatkeqësisht, ka qenë gjithçka e vonshme dhe këta tre anëtarë të familjes Haliti u shuan. Gjilani po kalon ditë të zeza, duke u solidarizuar me familjen Haliti për këtë humbje të madhe e cila, po ashtu, duhet ta përballojë këtë gjendje pasi tre djem dhe një vajzë të moshës madhore janë trashëgimi e kësaj familje”, ka  thënë Haziri, duke shtuar se janë duke pritur rezultatin zyrtar` të hetimeve të institucioneve të shtetit shqiptar, në mënyrë që edhe familja dhe komuniteti të jenë më të qetë.

“Me 8 maj zyrtarisht jam njoftuar nga institucionet e Shqipërisë për ndërmarrjen e veprimeve urgjente të organeve të shtetit, që përfshinë krimet e rënda, për fillimin e hetimeve dhe ndërmarrjet e para hetimore. Presim rezultatin zyrtar, në mënyrë që edhe familja dhe komuniteti të jenë më të qetë”, është shprehur Haziri.