Ministria e Shëndetësisë e Kroacisë ka ndaluar përkohësisht programin e transplantimit të veshkave nga donatorë të gjallë në Qendrën Spitalore në Zagreb, për shkak të dyshimeve për trafikim të organeve atje, në vitin 2019.

Siç ka raportuar Radiotelevizioni kroat (HRT), bëhet fjalë për dhurues të veshkave nga Serbia dhe Kosova – “të dy me status më të ulët social”,  ndërsa pranuesit e organeve janë burra nga Kroacia.

Ministria kroate e Shëndetësisë, ka thënë se rasti, fillimisht është dorëzuar në Dhomën e Mjekëve të Kroacisë, për shkak të shkeljes së Kodit të Etikës Mjekësore, ndërsa më pas edhe në Prokurorinë e Shtetit.

Duke iu përgjigjur akuzave për trafikim organesh, Qendra Spitalore në Zagreb ka thënë se “të gjitha transplantimet janë kryer me miratimin e Komisionit të Etikës” të kësaj qendre.

“Të gjitha aktivitetet dhe procedurat e ndërmarra janë identike me procedurat që kryhen në të gjitha qendrat tjera të transplantimeve në Republikën e Kroacisë, ku bëhen transplantime të veshkave nga një donator i gjallë, që nuk ka lidhje me pranuesin”, është thënë në një deklaratë të Qendrës Spitalore në Zagreb, transmeton “Radio Evropa e Lirë”.

Në Kroaci, transplantimi i organeve nga donatorë të gjallë, që nuk kanë lidhje me pranuesin  është i mundur.

Kontrollet janë të rrepta dhe donatorët duhet t’u nënshtrohen testeve specifike psikologjike, miratimit nga ekspertë të qendrës së transplantimit dhe komisionit të etikës së institucionit shëndetësor ku kryhet transplantimi, raporton “HRT”.

Reklamimi i disponueshmërisë ose nevojës për organe dënohet me burgim deri në tre vjet.

Avokatja Nevena Alinoviq, nga Departamenti i Shkencave Ligjore në Universitetin e Splitit, ka thënë për “HRT”-në se transplantimi i organeve në rastet kur personi dhurues është viktimë e trafikimit me qenie njerëzore, ndëshkohet me dënimin më të rëndë – deri në dhjetë vjet burgim.

Sipas “HRT”-së, Kroacia, me më shumë se 100 transplantime veshkash në vit është në mesin e vendeve udhëheqëse në botë.