Shefi i Grupit Parlamentar të LDK-së, Avdullah Hoti ka adresuar kritika ndaj qeverisë aktuale, duke thënë se Kosova ka qeverinë më të dobët që nga shpallja e pavarësisë.

Në profilin e vet në “Facebook”, Hoti ka shkruar se qeveria e udhëhequr nga Ramush Haradinaj gjatë 100- ditëshit të saj nuk ka arritur të shtyjë asnjë projekt madhor përpara. Ai ka bërë me dije se BE-ja e ka kthyer luftimin e korrupsionit si kusht për liberalizmin e vizave, kusht ky që, sipas Hotit, ishte hequr gjatë qeverisjes së Isa Mustafës.

Postimi i plotë i Hotit në “Facebook”:

Kosova ka qeverinë më të dobët dhe më të brishtë që nga shpallja e pavarësisë. Mënyra si është themeluar koalicioni qeverisës e determinon progresin e dobët të qeverie. Me këtë përbërje që ka Qeveria, asnjë projekt madhor nuk mund të shtyjë përpara. Presioni nga partnerët e vegjël të koalicionit është e natyrshme që e bënë qeverinë jofunksionale. Këto 100 ditë të qeverisjes njihen vetëm për numrin enorm të zëvendësministrave, gati nga një në ditë i emëruar, dhe nuk dihet kur do të përfundojë. Nuk kemi parë asnjë nismë madhore legjislative që ka nisur kjo qeveri. Vendi po shënon stagnin. Luftimi i korrupsionit, si kusht për liberalizim të vizave, është kthyer prapë nga Bashkimi Evropian. Ky kusht ishte hequr gjatë Qeverisë Mustafa pasi konsiderohej se Qeveria kishte treguar përkushtim serioz në luftimin e kësaj dukurie gangrenë për shoqërinë dhe shtetin e Kosovës.