Gjatë ditës së djeshme u raportua që Isa Mustafa do ta emërojë njërin nga zyrtarët e lartë të LDK-së si ushtrues detyre për kryetar. Kjo deri në kohën kur kryetari aktual të kthehet nga Gjermania ku po qëndron për shkaqe shëndetësore.

Madje raportohej se ky vendim i Mustafës kishte shkaktuar “trazira” te kandidatët potencial që synonin postin e të parit të partisë.

Por lajmet e tilla i ka demantuar shefi i grupit parlamentar të LDK-së, Avdullah Hoti.

Hoti ka thënë për lajmi.net se këto lajme janë spekulime.

Ai ka bërë të ditur se kryetari i LDK-së, Isa Mustafa pritet që së shpejti t’i kthehet aktiviteteve politike, pasi nuk ka asgjë për tu shqetësuar.

“Janë spekulime. Shëndeti i Kryetarit Mustafa po përmirësohet. Ai së shpejti do të kthehet tek familja dhe në aktivitetet politike. Nuk ka asgjë shqetësuese”, ka deklaruar Hoti.

Shefi i Grupit Parlamentar të LDK-së tutje ka mohuar se në këtë parti do të ketë zgjedhje të brendshme para kohe.

Ai ka deklaruar se zgjedhjet do t’i mbajnë sipas afatit që është i përcaktuar me statut.

“Zgjedhjet në LDK mbahen në afatin e rregullt statutar”, ka thënë Avdullah Hoti.

Në bazë të kësaj deklarate i bie që zgjedhjet e brendshme në LDK të mbahen vitin e ardhshëm.

Kjo pasi Isa Mustafa për herë të dytë si kryetar i LDK-së ishte zgjedhur në vitin 2015.

E zgjedhjet në këtë parti mbahen çdo 4 vite.

Ndryshe emrat e përmendur që synojnë të parin e LDK-së janë Lutfi Haziri, Agim Veliu, Avdullah Hoti e Vjosa Osmani.