Deputeti i Lidhjes Demokratike të Kosovës (LDK), Avdullah Hoti, ka thënë se rritja prej 20 për qind e pensioneve nuk është as rritje reale, pasi sipas tij nuk mbulohet as zhvleftësimi real për shkak të rritjes së çmimeve.

Hoti ka theksuar se para dy viteve ka kërkuar indeksimin e pensioneve dhe skemave sociale në raport me shifrën e inflacionit.

“Pse pas katër vitesh në pushtet rriten pensionet? Pse nuk u rritën kur inflacioni ishte në kulm në fund të vitit 2022 dhe fillim të vitit 2023? Kjo nuk është rritje reale. Kjo rritje nuk e mbulon as zhvlerësimin real për shkak të inflacionit. Sikur pensionet dhe skemat sociale të indeksoheshin për inflacionin, siç kam propozuar para dy vitesh, sot do të kishim situatë tjetër”, ka shkruar Hoti në “Facebook”.