Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, gjatë vizitës zyrtare në Itali ka vizituar shkollën shqipe “Scanderbeg” në Parma me kryesues Durim Lika dhe Forumin e Grave të Pavarura me drejtuese Elvira Lashi.

Hoti ka përgëzuar Likën për përkushtimin e dhenë për shkollën shqipe në Itali dhe e ka informuar atë për Programin Nacional për Rininë.

“Unë edhe në takimet e mëparshme këtu në Itali u informova për punën që bëni ju. Është për t’u vlerësuar lartë kontributi juaj për mësimin në gjuhën shqipe sepse vetëm me një përkushtim të tillë shqiptarët kudo në botë do të mund të ruajnë kulturën dhe gjuhën shqipe. Unë po ju prezantoj Programin Nacional për Rininë qe jemi duke e implementuar ne në Kosovë për të gjithë nxënësit pa dallim. Ai është duke u realizuar në formë të garës në Kreativitet Kulturor dhe Mendim Kritik, Dituri dhe në Sport. Në udhëzuesit që ju kam sjell gjeni të gjitha detajet për organizimin e garës. Unë pres bashkëpunim nga ju që nxënësit e diasporës të marrin pjesë dhe në nivelin republikan të garës të vinë të garojnë në Kosovë”, ka thënë Hoti, duke shtuar se atdheu ynë nuk mund të jetoj pa diasporën.

Ndërsa Lika e ka mirëpritur vizitën e koordinatorit Hotit po ashtu edhe programin. Ai e ka informuar Hotin për funksionimin e shkollës “Scanderbeg” si dhe për sfidat që ata hasin sa i përket mësimit në gjuhën shqipe.

“Është nder i veçantë për ne që sot të jeni në vizitë tek ne. Shkolla jonë është krijuar në vitin 2009 dhe tani Parma është shembull sa i përket mësimit në gjuhën shqipe në Itali. Mirëpo, problemi më i madh me të cilin përballemi është sigurimi i librave në gjuhën shqipe edhe pse bashkëpunojmë me institucionet e Shqipërisë dhe Kosovës”, ka thënë Lika.

Më tutje, ai ka prezantuar disa nga organizimet që ka bërë kjo shkollë vitin paraprak dhe këtë vit.

Hoti i ka premtuar Likës se në një të ardhme të afërt do t’i sjell shkollës libra në gjuhën shqipe.

Pas takimit, koordinatori Hoti i shoqëruar nga Lika, ka vizituar edhe nxënësit në klasë të cilët po zhvillonin orën e artit figurativ si dhe grupin e vallëzimit. Aty Hoti është takuar edhe me Elvira Lashin, drejtuesen e Forumit të Grave të Pavarura dhe mësueset e shkollës.

Gjatë ditës, koordinatori Hoti ka marrë pjesë si i ftuar i veçantë i manifestimit të festës së përvjetorit të 107 të Pavarësisë së Shqipërisë.

Ky manifestim është organizuar në Reggio Emilia nga shoqatat “Shqiponja” dhe “Zëri i Atdheut”.

/Epoka e re/