Grupi punues Panevropian i Partive Popullore Evropiane (EPP) në Parlamentit Evropian ka organizuar konferencë me temën “Procesi integrues për shtetet e Evropës juglindore” ku panelistë ishin ministrja e Integrimit Evropian, Dhurata Hoxha, kryetar i Komisionit AFET të Parlamentit Evropian, David McAllister, si dhe eurodeputeti austriak, Lucas Mandle.

Me këtë rast Hoxha ka theksuar rëndësinë e procesit integrues për vendet e Evropës juglindore duke vënë në fokus të arriturat dhe sfidat e procesit integrues, rasti i Kosovës.

Ministrja ka bërë me dije se është prioritet nacional dhe çështje e konsensusit të gjerë institucional e politik, me përkushtim të fuqishëm në realizimin e Marrëveshjes së Stabilizim Asociimit, Reformat e Agjendës Evropiane si dhe reformat tjera, të parapara me strategjitë e përbashkëta.

“Në këtë fazë ne jemi duke zhvilluar takime me vendet e veçanta të Bashkimit Evropian duke diskutuar çështjet e lidhura me liberalizimin e vizave. Në veçanti me vendet që kanë qasje hezituese ndaj këtij procesi duke dhënë argumente rreth përmbushjes së kritereve të parapara me udhërrëfyes. Migrimi si çështje elektorale e ngritur në disa vende të BE-së, nuk ka të bëj me qytetarët tonë. Dihet se Kosova nuk gjendet as në 30 vendet me numër të emigrantëve, andaj, kjo çështje do parë si çështje elektorale e vendeve të BE-së, në procese e fushata zgjedhore”, është shprehur Hoxha, duke shtuar se vendimmarrja për liberalizim duhet të ndodh gjatë presidencës austriake të kryesimit të BE-së.

Sipas saj, duhet të njihen të arriturat e Kosovës, si dhe ndikimet në proceset e gjithëmbarshme në rajon, aq më parë kur Kosova është vendi i vetëm pa lëvizje të lirë në vendet e Shengenit.

“Ne, kemi përmbushur të gjitha kushtet e parapara me udhërrëfyesin e vizave. Kemi filluar me fushatën njoftuese për qytetarët rreth këtij procesi, të bindur fuqishëm se rruga integruese është rruga jonë e vetme. Pa alternativë. Vendimmarrja pozitive në këtë proces do të jetë lajm i pritur nga të gjithë ne”, ka deklaruar Hoxha.

Ndërsa kryetari i Komisionit AFET të Parlamentit Evropian David McAllister, ka thënë se procesi integrues për shtetet e Evropës juglindore është sfidë të cilën duhet ta fitojnë këto vende, me përkrahjen e Bashkimit Evropian.

“Të arriturat e kësaj pjese të Evropës, sot reflektojnë në institucionet e BE-së, duke qenë rajon i paqes, fuqizimit të sundimit të ligjit, demokracisë dhe vlerave tjera të Bashkimit Evropian”, ka theksuar ai.

Ai ka ftuar deputetët e Partive Popullore por edhe deputetët tjerë, të vihen krah interesave të këtij rajoni në procesin integrues, duke kontribuar kështu, jo vetëm në zgjerimin e BE-së në këtë pjesë të Ballkanit, por edhe duke hapur dyert për përqafimin e vlerave të BE-së nga qytetarët e këtyre vendeve, duke u bërë zonë e mirëkuptimit, paqes dhe fqinjësisë së mirë.

McAllister ka vlerësuar se Kosova ka përmbushur të gjitha kushtet për liberalizim, dhe pret që vendet e BE-së, të njohin këtë arritje dhe të japin dritën e gjelbër për lëvizjen e lirë për qytetarët e Kosovës.

/Epoka e re/