Deputeti i Partisë Demokratike të Kosovës (PDK), Enver Hoxhaj, ka folur për dyvjeçarin e qeverisjes Kurti, duke thënë se gjatë kësaj kohe qytetarët janë varfëruar dhe është rritur kostoja e jetesës.

“Çfarë ka ndodhur në këto dy vite, ka qenë varfërim i qytetarëve dhe rritje e kostove të jetesës, po ashtu edhe një izolim i jashtëm i shtetit të Kosovës. Kosova nuk ka pritje në politikën e saj të jashtme, nuk ka avancim të agjendës së saj të integrimit evropian dhe nuk ka një hap konkret për afrimin me NATO-n. Pritjet e mia ka qenë të tilla dhe po konfirmohen”, ka thënë Hoxhaj për “ABC News”

Në lidhje me incidentet në veri së fundmi, ai ka thënë se këto janë akte të orkestruara nga Beogradi dhe janë një mesazh për pengimin e zbatimit të marrëveshjes së arritur në Ohër.

“Djegia e makinave në veri është një nga akt i orkestruar nga Beogradi. Këtu kërkohet nga Qeveria e Kosovës që ushtrojë trysni ndaj partnerëve që të jenë të vendosur për zbatimin e kësaj marrëveshje. E pakuptim që të arrihet një marrëveshje dhe ndërkohë vazhdojnë incidentet në veri të vendit. Ky ka qenë një mesazh i Serbisë, për të penguar zbatimin e marrëveshjes së Ohrit”, ka thënë Hoxhaj.