Nënkryetari i Kuvendit të Kosovës nga radhët e PDK-së, Enver Hoxhaj ka folur për situatën në veri të Kosovës dhe çështjen e Asociacionit të komunave me shumicë serbe.

Hoxhaj ka thënë se kryeministri Kurti në këto tri vite të qeverisjes ka luftuar komplet në vijë të kundërt të trendëve ndërkombëtare dhe ndryshimeve gjeopolitike, duke e përdorur veriun e Kosovës si platformë për ta konsoliduar pushtetin e tij.

“Me luftën në Ukrainë, me luftën në Gaza, me një luftë të mundshme në Tajvan, është ka shpërbëhet rendi ndërkombëtar dhe zoti Kurti ka luftuar komplet, në vij të kundërt të trendëve ndërkombëtare, të ndryshimeve gjeopolitike dhe mbi të gjitha ka vendos që në emër të një politike që sa më shumë ta konsolidon pushtetin e tij të brendshëm duke përdorë veriun e Kosovës si një platformë për ta konsoliduar pushtetin e tij”, ka thënë Hoxhaj.

Ish-ministri i Jashtëm i Kosovës, ka thënë se situata e veriut të vendit i shërben për të qenë në pushtet Albin Kurti në Prishtinë dhe Aleksandër Vuçiqit në Serbi.

Hoxhaj ka theksuar se PDK-ja asnjëherë nuk e ka përdorur situatën në veri të vendit për popullizëm politik.

“Ne kemi vepruar në raport me veriun e Kosovës, duke shpërbërë struktura paralele, duke luftuar krimin dhe krimin e organizuar në veri të vendit duke bërë çdo gjë që ta përmbyllim shtet ndërtimin e Kosovës në veri të vendit, duke integruar komunitetin serb. Ne asnjëherë nuk e kemi përdorë situatën e veriut të Kosovës për popullizëm politik. Kjo se çfarë po ndodh në veri të vendit nuk është në përputhje me interesin nacional të shtetit të Kosovës”, ka thënë Hoxhaj. /Telegrafi