Zëvendëskryetari i Partisë Demokratike të Kosovës (PDK), Enver Hoxhaj, i është përgjigjur liderit të Lidhjes Demokratike të Kosovës (LDK), Isa Mustafa, i cili sot e ka ftuar PDK-në dhe liderin e saj të maten në zgjedhje të reja.

Në profilin e vet në “Facebook”, Hoxhaj ka shkruar se jo çdoherë në politikë lideri i LDK-së ka bërë lëvizjet dhe zgjedhjet më të mira.

“Kam pasur dhe ende kam respekt për Isa Mustafën, si profesor dhe politikan. Megjithëse jo çdoherë në politikë ai ka bërë lëvizjet dhe zgjedhjet më të mira. Në një reagim të tij sot për zhvillimet aspak të këndshme lidhur me pamundësinë e votimin të demarkacionit nga qeveria e udhëhequr prej tij duke sulmuar PDK-në, do të ndalem në dy momente. E para, vendimmarrja e tij si kryeministër asokohe u bllokua nga një pjesë e partisë së tij, të cilët jo vetëm që i dolën kundër demarkacionit por as nuk e votuan atë për kryeministër”, ka shkruar Hoxhaj, duke ia rikujtuar Mustafës se sot po pranon në shtëpinë e tij ata që sa ishte kryeministër, çdo ditë të punës, e gjuanin me koktej molotovi e vezë.

“E dyta, Isa Mustafa po ankohet në një pjesë të qeverisë aktuale që sipas tij udhëhoqën protesta të dhunshme kundër demarkacionit para dy vitesh. Por ai i mbetet borxh elektoratit të LDK-së t’ia shpjegoj pse i pranon në shtëpi ata që e gjuajtën me koktej molotovi, vezë, e gaz lotsjellës në çdo ditë të punës së tij. Në fund, pajtohem me kryetarin e LDK-së që duhet gjetur një nyje besimi për tu bërë bashkë në procesin e dialogut me Serbinë. Për PDK-në është Kuvendi i Kosovës ku edhe LDK-ja duhet të bashkohet në takimet dhe diskutimet e ardhshme për të nxjerrë më të mirën e mundshme”, ka shkruar Hoxhaj.

/Epoka e re/