Ish-ministri i jashtëm i Kosovës, Enver Hoxhaj, gjatë një vizite në Austri, ka takuar disa deputetë të Kuvendit të Austrisë, përfshirë edhe ish-kancelarin austriak Sebastian Kurz.

Hoxhaj, tha se pati një bashkëbisedim me ish-kancelarin Kurz për më shumë angazhim nga Austria për integrimin e shpejtë të Kosovës në BE, paqe e siguri në Ballkan.

“Bashkëbisedim me mikun tim të madh, ish-kancelarin Sebastian Kurz për më shumë angazhim nga Austria për integrim të shpejtë të Kosovës në BE dhe për paqen e sigurinë në Ballkan”, ka shkruar Hoxhaj në rrjetin social “Facebook”.

Ai gjithashtu gjatë ditës së sotme ka njoftuar sr ka takuat edhe deputetin e Kuvendit të Austrisë, Helmut Brandstätter, për të cilin tha se është një zë i fuqishëm evropian i Ballkanit.

Deputeti i PDK-së, Enver Hoxhaj gjatë ditës së djeshme ka takuar edhe tre deputetë austriakë nga tri parti të ndryshme, por siç u shpreh ai, të bashkuar për Kosovën.

“Në Kuvendin e Austrisë, takova deputetë nga tri parti të ndryshme, por të bashkuar për Kosovën, si znj. Carmen Jeitler-Cincelli (OVP), e cila është Kryetare e Grupit të Miqësisë Kosovë-Austri, znj. Ewa Ernst-Dziedzic (Grüne) njëherësh edhe Kryetare e Grupit të Miqësisë Shqipëri-Kosovë dhe z. Johannes Margreiter (NEOS)!”, ka shkruar Hoxhaj, derisa ka publikuar një video nga ky takim në Parlamentin e Austrisë.