Zëvendëskryeministri i Kosovës, Enver Hoxhaj, po qëndron në Salzburg të Austrisë, ku po merr pjesë në Konferencën e 14-të për rajonet dhe qytetet evropiane.

Në fjalën e tij në këtë konferencë, zëvendëskryeministri Hoxhaj ka thënë se Bashkimi Evropian duhet që përmes vendimit në Këshillin Evropian ta njohë dhe pranojë përmbushjen me sukses nga ana e Kosovës të të gjitha kritereve për liberalizimin e vizave.

“Me gjithë faktin se është dashur t’i përmbushim 95 kritere për liberalizim, në krahasim me vendet e tjera të rajonit të cilat kanë pasur rreth 45, Kosova suksesshëm ka bërë plotësimin e secilit kriter. Bashkimi Evropian duhet ta njohë dhe ta pranojë progresin e Kosovës në procesin e liberalizimit të vizave dhe t’i jap dritën e gjelbër lëvizjes së lirë të qytetarëve të Kosovës”, ka deklaruar  Hoxhaj.

Ai ka folur edhe për raportin e Bashkimit Evropian me shtetet e rajonit, ku ka përmendur mosnjohjen e progresit të shënuar të Shqipërisë dhe Maqedonisë nga ana e BE-së, dhe se si kjo mosnjohje dhe mosshpërblim i punës, ka pasur pasoja të dukshme.

“Bashkimi Evropian duhet të punojë që ta mbajë gjallë optimizmin dhe frymën evropiane në Ballkan. Mosnjohja dhe mosshpërblimi i progresit të Shqipërisë, dhe në veçanti të Maqedonisë ka shënuar pasoja. Rasti konkret është, siç e keni parë të gjithë, votimi i djeshëm në referendumin për Marrëveshjen e Prespës në Maqedoni”, ka deklaruar zëvendëskryeministri Hoxhaj.

Ai ka theksuar se anëtarësimi i shteteve të Ballkanit në BE nuk është vetëm zgjerim i unionit, por edhe konsolidim i tij meqë gjeografikisht, kulturalisht dhe historikisht, Ballkani është pjesë e Evropës.

/Epoka e re/