Nënkryetari i Partisë Demokratike të Kosovës Enver Hoxhaj, ka reaguar pas ftesës nga Gjykata Speciale të kryetarit të PDK-së Kadri Veseli.

Hoxhaj me këtë rast ka thënë se kjo është thirrja e fundit për t’i shërbyer Kosovës dhe luftës së pastër të UÇK-së.

“Kadri Veselin e njoh mbi 30 vite. Ai është i njëjti edhe sot, si dikur – ushtar i vendit të vet, i lirisë dhe i pavarësisë së Kosovës. Thirrja nga Specialja është vetëm një betejë e fundit e padrejtë për t’i shërbyer Kosovës dhe luftës së pastër të UÇK-së. Veprimi prej burrështetasi sot, flet për Kadriun që e njohim të gjithë, i matur dhe i vetëdijshëm se fati i Kosovës është para atij personal”, ka shkruar Hoxhaj në llogarinë e vet në “Facebook”.

Ai ka shtuar se Kosova dhe djemtë e saj do të dalin faqebardhë sepse krime ka kryer vetëm Serbia, dhe agresion kanë ushtruar forcat ushtarake dhe paramilitare serbe.

“Ne në PDK, jemi krenarë dhe besimplotë se sikur në luftë, edhe në paqe, dimë t’i dalim zot Kosovës”, ka shkruar Hoxhaj.