Kryetari në detyrë i Partisë Demokratike të Kosovës (PDK), Enver Hoxhaj së bashku me anëtarin e kryesisë, Elmi Reçica, kanë pritur të enjten në takim shefin e Misionit të EULEX-it, Lars-Gunnar Wiegemark.

Në këtë takim, kryetari Hoxhaj ka folur me shefin e Eulex-it për Gjykatën Speciale dhe zhvillimet aktuale politike në vend, raporton “Epoka e re”.

Shef i Misionit të EULEX-it, Lars-Gunnar Wiegemark ka folur edhe për punën që bën EULEX në monitorimin e gjyqësorit në Kosovë.

Ndërkohë, Hoxhaj ka deklaruar qasjen konstruktive të Partisë Demokratike të Kosovës, e cila edhe pse në opozitë, është gjithmonë e gatshme që të jap kontributin e saj në të mirë të shtetit dhe qytetarëve, siç ishte rasti i fundit me votimin e pakos së Rimëkëmbjes Ekonomike.

Po ashtu, dialogu Kosovë – Serbi, si një proces i cili ka çaluar shumë vitin e fundit, ishte një tjetër temë për të cilën u diskutua. Edhe gjatë kësaj teme, kryetari në detyrë i Partisë Demokratike të Kosovës kërkoi që Serbisë t’i bëhet akoma më shumë presion n ë lidhje me zbardhjen e fatit të të pagjeturve në Kosovë, trupat e të cilëve po zbulohen edhe sot e kësaj dite atje.

Në fund, kryetari në detyrë, Enver Hoxhaj ka përsëritur qëndrimin e PDK-së për konstruktivitet të plotë me të gjithë ata të cilët punojnë në të mirë të Republikës së Kosovës dhe qytetarëve të saj.