Zëvendëskryetari i PDK-së, Enver Hoxhaj ka thënë se ofrimi i dorëheqjes nga ana e ministrit të Drejtësisë, Abelard Tahiri ka të bëjë me sektorin që ai e qeverisë, e jo me probleme në PDK.

Ai në “Dossier D” në “RTV Dukagjini” ka thënë se Tahiri kishte lajmëruar me telefon edhe kryetarin e PDK-së, Kadri Veseli, edhe kryeministrin Haradinaj por ishte konsultuar edhe vetë më të personalisht.

“Tahiri nuk ka dorëzuar dorëheqje me shkrim. Haradinaj është treguar fer dhe i ka thënë atij të konsultohet me kryetarin Veseli. Veseli e ka parandaluar një dorëheqje të tillë. Ai mbetet në funksionin që ka”, ka thënë Hoxhaj.

Duke folur për raportimet e mediave se ka përplasje Veseli-Thaçi, Hoxhaj është shprehur se Thaçi i takon historisë së PDK-së, ndërsa Veseli është kryetar dhe ai vendos për PDK-në.

Hoxhaj po ashtu ka thënë se PDK-ja do të hapet për struktura të reja por edhe kontribuuesit e deritanishëm do të kenë vendin e tyre të respektuar.

“Në vitin 2018 ne (PDK) nuk mund të operojmë me një softuer të vitit 2007, duhet të bëhet update, të shohim se si do të duket iPhone më i ri i quajtur PDK”, ka thënë ai.

Ai ka shtuar se PDK vazhdimisht ka pasur vullnet të bëj ndryshime, dhe ministrat që vijnë nga ky subjekt tregojnë më së miri.

“A do jetë ndryshimi në struktura 30% apo më shumë, atë nuk e di për momentin”, deklaroi Enver Hoxhaj.