Tarifat e reja të presidentit amerikan, Donald Trump ndaj dhjetëra vendeve kanë hyrë në fuqi, duke përfshirë tarifat 104% për mallrat kineze, duke thelluar luftën tregtare globale.

Raundi i të ashtuquajturave tarifa “reciproke” mbi importet në SHBA vjen pasi taksat ndëshkuese të presidentit amerikan kanë tronditur një rend tregtar global që ka vazhduar për dekada, ka ngritur frikën e recesionit dhe ka shtyrë stoqet në mbarë botën në rënie të mprehtë, raporton The Guardian,

Trump gati dyfishoi tarifat për importet kineze, të cilat ishin vendosur në 54% javën e kaluar, në përgjigje të kundër-tarifave që Pekini shpalli javën e kaluar. Kina është zotuar të “luftojë deri në fund” për atë që e sheh si shantazh.

Trump u ka ofruar investitorëve sinjale të përziera nëse tarifat do të mbeten në terma afatgjatë, duke i përshkruar ato si “të përhershme”, por gjithashtu duke u mburrur se po u bëjnë presion liderëve të tjerë që të kërkojnë negociata.

“Kemi shumë vende që vijnë që duan të bëjnë marrëveshje”, tha ai në një ngjarje në Shtëpinë e Bardhë të martën pasdite. Ai tha në një ngjarje të mëvonshme se ai priste që edhe Kina të ndiqte një marrëveshje.