Moderatorja e dashur për publikun, Bora Zemani, ka kujtuar mbrëmjen e djeshme hyrjen e saj të bujshme në shtëpinë e “Big Brother VIP” në tetor të vitit të kaluar.

Në atë kohë, Bora u bë pjesë e saj për të takuar mikeshën e ngushtë, Semi Jaupaj, por përfundoi duke u takuar edhe me aktorin e humorit, Donald Veshaj, nga i cili ishte ndarë prej 6 muajsh.

Pasi biseduan, dyshja shkëmbeu edhe një puthje në buzë që u mor si një ribashkim i tyre. Por më vonë gjërat morën një rrjedhë krejt tjetër, pasi Donaldi krijoi një romancë të shkurtër me këngëtaren e njohur, Beatrix Ramosajn.

E pavarësisht të gjithave, Bora duket se nuk është penduar për asgjë. Të paktën kështu na ka lënë të kuptojmë me veprimin e saj të fundit duke shpërndarë një video nga takimi i saj me Semin.

Moderatorja e njohur ka ndarë me ndjekësit në “Instastory” një video nga një faqe fansash që ka përmbledhur disa nga momentet e tyre më të bukura, ku pjesa më e madhe e videos mbizotërohet nga takimi në shtëpinë e famshme.