Një zyrtar policor mbrëmë ka gjuajtur në drejtim të qenve endacakë që iu vërsulën në mes të rrugës në Vushtrri.

Polici u detyrua ta përdorë armën zyrtare për t’i zmbrapsur qentë dhe tashmë lidhur me rastin janë vënë në dijeni Prokurori i Shtetit dhe IPK-ja.

Lajmin e kanë konfirmuar edhe nga Inspektorati Policor i Kosovës, me ç’rast është bërë me dije se hetimi ka nisur në drejtim të veprës penale “Përdorimi i armës”.

“Lidhur me rastin IPK-ja ka nisur hetimet lidhur me një rast të përdorimit të armës zyrtare nga një zyrtar policor.

Rasti po hetohet edhe në koordinim me prokurorin e Shtetit. Për detaje do t’ju njoftojmë me kohë”, thanë nga IPK-ja.

Rasti ka ndodhur në rrugën “Rifat Galica” teksa polici ishte duke u kthyer në shtëpi, kur papritmas ia zunë rrugën një numër i madh i qenve.

Nga ky incident asnjëri nga qentë nuk ka pësuar lëndime e as ndonjë qytetar.

Në vendin e ngjarjes kanë intervenuar ekipet përkatëse të policisë dhe janë kryer ekzaminimet e nevojshme.