Mësueses 36-vjeçare nga Peja, Drenusha Zymberaj-Morina i është dhënë lamtumira e fundit sot në varrezat e fshatit Trestenik të Komunës së Pejës.

Një numër i madh i qytetarëve nga vendet e ndryshme të vendit i kanë dhënë lamtumirën e fundit mësueses Drenusha, e  cila  deri në ditët e fundit të jetës së saj ka dhënë kontribut në edukimin e brezave të rinj në shkollën e “Rilindja” në Trestenik dhe paralelen e ndarë në fshatin Lutogllavë, raporton “Epoka e re”.

Në fjalën e rastit gjatë ceremoninë mortore, arsimtari Sefedin Berisha e ka vlerësuar lartë kontributin e mësueses Drenusha. Ajo ka lindur në fshatin Ruhot më 22 shkurt të vitit 1985 dhe rrjedhë nga një familje patriotike dhe intelektuale. Shkollën fillore e kreu në Trestenik, kurse të mesmen në Shkollën e Mjekësisë në Pejë. Ndërkohë e me sukses të plotë e kreu fakultetin e Edukimit në Gjakovë. Më 1 shtator 2007 është punësuar në shkollën Rilindja. Drenusha pas vetës la burrin dhe tre fëmijë, dy djem dhe një vajzë.