Gjyqtari Ortiz Nava është pezulluar për gjashtë muaj nga futbolli, sepse i kërkoi një autograf Leo Messit në fund të ndeshjes.

Meksikani iu afrua sulmuesit të Inter Miami, në përfundim të ndeshjes së parë ndaj Kansas Cityt, e vlefshme për Ligën e Kampionëve të Konfederatës së Amerikës Veriore dhe Qendrore.

Pamja u kap nga kamerat që transmetonin ndeshjen, ndërsa edhe zyrtarët e Kansas Cityit e denoncuan ngjarjen. Menjëherë konfederata nisi hetimin dhe e cilësoi veprimin të papërshtatshëm dhe shkelje e normave të kodit të sjelljes. Edhe pse u mbrojt duke deklaruar se autografin e kërkoi për një anëtar të familjes me nevoja speciale, në fund gjyqtari e pranoi pezullimin gjashtë mujor.