I nxehti ekstrem me temperaturat rekord që prekën thuajse 50 gradë celcius në Kanada ka shkaktuar të paktën 140 të vdekur.

Pyetja që po bëhet gjithnjë e më shumë është se përse ky numër kaq i lartë viktimash nga moti ekstrem në një vend me mirëqënie të lartë e me mundësi të mëdha përdorimi të teknologjisë dhe të kondicionerëve?

Përgjigja është e thjeshtë. Zonat ku ka goditur i nxehti ekstrem shquhen përgjithësisht për dimër të ashpër dhe verë të freskët me temperatura mesatare që rrallë kalojnë 30 gradë celcius.

Për këtë arsye, pjesa më e madhe e kanadezëve në këto zona nuk përdorin kondicionerë në shtëpi, por vetëm sisteme ngrohjeje që u nevojitet përgjatë periudhës së dimrit.

Shumë janë strehuar nëpër qendrat sociale dhe salla me ajër të kondicionuar të hapura nga shteti.

I nxehti ekstrem ka shkrirë asfaltin në disa rrugë të Kanadasë Perëndimore e po ashtu edhe kablla të energjisë elektrike.

Qendrat e vaksinimit anti-Covid u mbyllën, ose u zhvendosën, shkollat u mbyllën gjithashtu dhe transporti publik në disa zona u ndërpre.

Dyqanet nisën shitjen me shpejtësi të kondicionerëve të lëvizshëm, freskueseve me ajër, akullit dhe ujit.

Ekspertët paralajmërojnë se fenomenet e motit ekstrem do të përsëriten edhe më shumë në të ardhmen për shkak të ndryshimeve klimatike globale.

Meteorologët parashikojnë që i nxehti të fillojë të tërhiqet gradualisht, por nuk do të marrë fund para ditës së diel.