Kërcënimet ndaj liderëve institucionalë duhet të trajtohen më shumë seriozitet. Kështu ka thënë njohësi i çështjeve të sigurisë, Nuredin Ibishi.

Teksa ka folur për kërcënimin ndaj shefit të Qeverisë, Ibishi ka theksuar se trajtimi i kësaj problematike duhet të vazhdojë deri në zbulimin e burimit, duke theksuar se ky është obligim i sektorit të sigurisë.

“Çdo kërcënim do të merret si serioz nga institucionet e sektorit të sigurisë dhe të zbatohen procedurat pa marrë parasysh deklaratat e personit ndaj të cilëve adresohet kërcënimi. Në këtë rast, kryeministrit Kurtit, i cili tha se nuk është ndier i rrezikuar nga një kërcënim i tillë dhe ka vazhduar agjendën. Mirëpo sektori i sigurisë duhet të ndërmerr veprimet e duhura”, ka thënë Ibishi për ‘Ekonomia Online”.

Ai thotë se në kuadër të policës funksionon njësiti i veçantë që merret me vlerësimin e kërcënimit, i cili rekomandon nëse duhet ose jo të ndërmerren masa në aspektin e ngritjes së sigurisë personale të atij që është kërcënuar. Pra është njësit i veçantë në Policinë e Kosovës që merret me vlerësimin e kërcënimit, dhe mandej ndërmerren masat edhe në aspektin e ngritjes së shkallës së sigurisë personale, qoftë në vend apo në lëvizje me qëllim që të mos të vihet deri të realizimi i kërcënimit”, ka deklaruar ai.

Ibishi ka theksuar se institucionet e sigurisë duhet të merren me rastet e tilla.

“Në rrjetet sociale ka kërcënime të ndryshme dhe vështirë që dikush t’i përcjellë ato. Vetë adresimi sikurse që ka ndodhur në këtë rast është zbuluar nga sektori i sigurisë dhe ata menjëherë kanë reaguar duke ngritur shkallën e sigurisë”.

Më këtë rast, Ibishi ka folur edhe për zgjedhjet lokale, duke shtuar se Prishtina ka pësuar degradime këto dy mandate sa ishte qeverisur nga Lëvizja Vetëvendosje.

Madje, ai tha se kandidati i Lidhjes Demokratike të Kosovës, Përparim Rama ka një program të mirëfillt evropian ndryshe nga kundërkandidati i Lëvizjes Vetëvendosje Arben Vitia, i cili e kopjon.

Javën e kaluar kryeministri i Kosovës Albin Kurti ishte kërcënuar nga persona të panjohur në rrjetet sociale.

Policia e ka ftuar si të dyshuar Kujtim Kurtin, një mërgimtar nga Gjermania.

Kujtim Kurti është ftuar të paraqitet në stacionin e Prizrenit për t’u intervistuar si i dyshuar për postimin e tij që e kishte bërë të dielën e 31 tetorit, ani pse në fletëthirrjen e policisë cilësohet si incident.

Ai në një postimit në rrjetin social “Facebook” kishte shkruar “100 mi kush vret Albin Kurtin”.