Ushtruesi i detyrës i drejtorit të QKUK-së, Valbon Krasniqi, ka thënë se, derisa ende nuk ka vaksinë kundër koronavirusit, mënyra më e mirë për t’u mbrojtur janë tri masa: mbajtja e distancës, vendosja e maskës dhe higjiena personale.

“Meqenëse kemi të bëjmë me një sëmundje që sulmon rrugët e frymëmarrjes, atëherë këto janë masat parandaluese më efikase deri më tash”, ka thënë Krasniqi në RTK. Sipas tij, përballja me këtë pandemi kërkon mobilizimin e të gjithëve. “Ky mobilizim ka nisur nga institucionet e sigurisë, mediat, por ajo që është më kryesorja, mobilizimi i qytetarëve të Kosovës”, ka thënë Krasniqi.

I pyetur për idenë e dhënë nga infektologu Ilir Tolaj që pandemia apo koronavirusi largohet vetëm me infektimin e tufës, pra lënia e lirë e qarkullimit të virusit për t’u krijuar imunitetit i masës, Krasniqi ka dalë kundër këtij propozimi. “Kjo është një qasje që e kemi parë edhe në Suedi, pra qasja e mosmbylljes. Ne në Kosovë e kemi bërë hapjen graduale, duke e zhvilluar edhe jetën, mirëpo është vështirë të kontrollohet infeksioni”, ka thënë ai. Sipas tij, tjetër gjë është ata që flasin dhe japin këso idesh, e tjetër gjë është për ata që kanë përgjegjësi. “Është vështirë të kesh infeksion të kontrolluar. Duhet të kesh resurse të mjaftueshme humane, infrastrukturore, të kesh ilaçe të mjaftueshme që të ndodhë ajo që ka bërë Suedia”, ka thënë Krasniqi, duke shtuar se nëse nuk i keni këto në dispozicion, atëherë një ndërmarrje e tillë do të ishte shumë e rrezikshme.