Kuvendi i Shqipërisë ka miratuar rekomandimin e raportit për çështjen e shkarkimit të Presidenti Ilir Meta.

Me 78 vota pro është vendosur që presidenti Ilir Meta të mos shkarkohet sipas gjetjeve dhe të raportit që Ulsi Manja paraqiti më herët, i cili tha se shkeljet e presidentit Meta nuk janë të rënda deri në shkarkim.

Ndërkohë 17 vota ishin kundër dhe 8 abstenim.

Historia e një viti debat u mbyll sot me rekomandimin për të bërë një ligj organik për institucionin e kreut të shtetit.

Kryeministri Edi Rama u shpreh në Kuvend se shumica do të iniciojë një nismë për një ligj organik për institucionin e Presidentit.

“Është koha që Kuvendi t`i jap drejtim qartësimit të kompetencave formale dhe substanciale, një ligj organik për Presidentin, ku të përfshihen përcaktimet për mosbllokimin e proceseve zgjedhore, të evitohet precedentët skandaloz, të bëhet një thjeshtim për dispozitat për emërimin e anëtarëve të gjykatës, sipas rekomandimeve të komisionit dhe mekanizmat zhblokues”, ka thënë Rama.

Sipas tij, nuk mund të ndodhë më që presidenti të refuzojë të dekretojë ministra. “Të gjitha duhen adresuar, jo për Ilir Metën, por institucionin e presidentit, që sot është kapur për fyti dhe përdoret si instrument për të bërë politikë partiake, për të nxitur konflikt dhe për të ushqyer konflikt. Ne kemi një president me hënë, sa herë hëna rrotullohet në drejtimin e duhur dhe bashkëpunon si në rastin e Covidit ne jemi në dispozicion për të bashkëpunuar” tha ai, raporton Tch.