Drejtori i Arsimit në Komunën e Pejës, Besim Avdimetaj, ka thënë se në kuadër të përgatitjeve për vitin e ri shkollor, janë testuar punëtoret në një çerdhe. “Për fat të keq, 19 punëtore të çerdheve kanë dalë të infektuara, ndërsa 25 tjera janë në pritje të rezultateve”, ka deklaruar Avdimetaj për Rtv Dukagjinin. Ai tha se të infektuarat nuk janë vetëm edukatore, por përfshijnë edhe kuzhinieret dhe stafin tjetër mbështetës.

Drejtori i Arsimit në Komunën e Pejës thotë se çerdhet kanë qenë të mbyllura prej një muaji e gjysmë kur edhe është ndërprerë mësimi në gjithë Kosovën.

Avdimetaj thotë se në bazë të informacioneve që kanë të gjitha të infektuarat janë pa simptoma. Ai ka thënë se Peja ka bërë përgatitjet për fillimin e vitit shkollor në bazë të udhëzimeve të institucioneve qendrore. Drejtori i Arsimit në Komunën e Pejës thotë se edhe në këtë komunë janë bërë përgatitjet edhe për mbajtjen e testit të maturës.