Grupi parlamentar i Aleancës për Ardhmërinë e Kosovës (AAK) mbetet i shqetësuar me ngritjen enorme të çmimeve dhe jo stabilitetit ekonomik në vend.

Deputeti nga ky subjekt, Pal Lekaj në tryezën e organizuar nga ky grup parlamentar për këtë temë, ka thënë se rritja e çmimeve është bërë e pa përballueshme për qytetarët.

Përkundër rritjes së çmimeve, ai ka thënë se në vend ka kohë që pagat dhe pensionet nuk janë rritur.

Deputeti Lekaj ka nis një iniciativë për një debat parlamentar sa i përket ngritjes së çmimeve dhe mos ngritjen e pagave.

Ndërsa Sakip Imeri nga Autoriteti i Konkurrencës ka thënë se mandati i këtij autoriteti është të mbajë konkurrencën e lirë në treg, pra jo siç tha ai për ngritjen e çmimeve.

“Ne si autoritet nuk kemi rol të rregullimit të çmimeve”, ka thënë ai.

Në këtë tryezë e cila po mbahet në ambientet e Kuvendit të Kosovës, po marrin pjesë edhe përfaqësues nga shoqatat e konsumatorëve dhe biznesit.