Skuadra e Major League Soccer, Inter Miami, është shpallur si shtesa më e re në Kupën e Botës për Klube të Fifa-s në vitin 2025.

Turneu i zgjeruar me 32 skuadra do të zhvillohet në Shtetet e Bashkuara në vitin 2025, nga data 15 qershor deri më 3 korrik.

Turneu do të përbëhet nga 12 ekipe nga Europa, gjashtë nga Amerika e Jugut, 12 nga Azia, Afrika dhe Amerika e Veriut, me dy vendet e fundit që do të shkojnë për një klub nga Oqeania dhe një tjetër nga Shtetet e Bashkuara – vendi mikpritës.

Inter Miami, i cili është në pronësi të përbashkët me David Beckham, ka fituar atë vend, pasi klubi fitoi “Supporters’ Shield” të MLS – që i jepet klubit në MLS me sezonin më të mirë të rregullt.

Njoftimi erdhi pasi Lionel Messi shënoi një hat-trick, duke ndihmuar Inter Miami të thyejë rekordin e pikëve të sezonit të rregullt të MLS.

“Ju keni treguar se në Shtetet e Bashkuara jeni vazhdimisht klubi më i mirë në fushën e lojës,” tha presidenti i Fifa-s, Gianni Infantino.

“Prandaj, jam krenar të njoftoj se si një nga klubet më të mira në botë, ju meritoni të merrni pjesë në Kupën e re të Botës për Klube të Fifa-s 2025.”

Messi, Sergio Busquets dhe Luis Suarez mund të përballen me Chelsea-n dhe Manchester City-n, të cilët tashmë janë kualifikuar për turneun.

Real Madrid, Bayern Munich, Paris Saint-Germain, Inter Milan, Porto dhe Benfica janë përfaqësues të tjerë nga Europa.

Vendi i 32-të në turne do t’i jepet fituesit të Copa Libertadores 2024.

Ndeshjet do të luhen në tetë stadiume në SHBA – përfshirë edhe stadiumin Hard Rock të Inter Miami-t – me finalen që do të zhvillohet në MetLife Stadium në New Jersey.

Shorti i plotë i Kupës së Botës për Klube do të hidhet në dhjetor.