Të shtunën e gjithë vëmendja e mbarë opinionit sportiv do të jetë e mbërthyer në “Allianz Arena”, teksa përballen dy skuadrat rivale të dy sezoneve të fundit për titullin kampion, Bayern Munchen dhe Bayer Leverkusen.

Nënkampionët e Bayernit kundrejt kampionëve aktualë, “Aspirinat” e Xabi Alonsos, në një 90 minutësh që pritet të jetë spektakolar. Pas katër javëve të para të dyja skuadrat ndahen me vetëm 3 pikë, me ekipin e Vincent Kompany që është treguar perfekt në këtë start kampionati, teksa i ka fituar të katër sfidat, ndërkohë që Leverkuseni numëron 3 fitore dhe 1 humbje atë ndaj Leipzigut.

Bayerni kërkon menjëherë të rikthejë titullin në Bavari, pasi sezonin e fundit ishte Leverkuseni që dominoi duke fituar titullin e parë në histori. Skuadra e Bayenit do të kërkojë edhe revanshin e sezonit të fundit edhe sa i takon sfidave direkte, ku në Munchen në fazën e parë ndeshja përfundoi në barazim 2-2, ndërsa në ndeshjen e kthimit “Aspirinat” triumfon thellë 3-0, një sfidë që përcaktoi në një farë mënyre edhe sezonin, me kuqezinjtë që u kurorëzuan në fund si kampionë.

Gjermanja “Kicker”, ka publikuar edhe një informacion shumë interesant lidhur me interesimin për këtë ndeshje. Sipas saj biletat për sfidën që do të zhvillohet të shtunën në “Allianz Arena” janë shitur të gjitha, më 25 korrik, rreth 2 muaj më parë. Ndërkohë që interesimin ka qenë aq shumë i lartë, teksa numërohen rreth 351.000 kërkesa për të siguruar një biletë. Një gjë është e sigurte: Tifozët që do të shohin nga shkallët e “Allianz Arenës”, supersfidën mes Bayernit dhe Leverkusenit duhet ta konsiderojnë veten me shumë fat.