Simone Inzaghit i kanë mjaftuar pak muaj tek Interi për të treguar se klubi ka bërë zgjedhjen e duhur duke i besuar atij pas largimit të Antonio Contes.

Ish-trajneri i Lazios po drejton skuadrën me shumë sukses duke mbajtur në kreun e renditjes edhe pse janë larguar lojtarë të rëndësishëm si Lukaku dhe Hakimi. Sipas “La Gazzetta dello Sport”, klubi është aq i kënaqur me trajnerin, sa po mendon që tani që t’i rinovojë kontratën që nënshkroi në verë.

Zikaltrit kanë mbetur shumë të kënaqur nga puna që po bën tekniku, mënyra se si stërvitet dhe loja me gola që po tregon skuadra.

Ndaj do të propozohet që në javët e ardhshme të negociohet rinovimi i kontratës së trajnerit italian e cila skadon në vitin 2023. Klubi tashmë është i gatshëm ta çojë kontratën deri në vitin 2025, duke i rritur rrogën nga 4 milionë euro në sezon, në 6 milionë euro në sezon.