Ish-ambasadori i Shteteve të Bashkuara të Amerikës në Kosovë, Greg Delawie, ka thënë se Bashkimi Evropian duhet të rindërtojë kredibilitetin në Kosovë, pas refuzimit për liberalizimin e vizave për kosovarët në vitin 2018.

Duke folur për raportet mes Kosovës e Serbisë, Delawie ka thënë se BE’ja mund të zgjidh këtë problem, por ka thënë se duhet të heq dorë nga një zakon.

“BE-ja mund ta zgjidhë problemin, por ajo duhet të heqë dorë nga zakoni i saj i ‘bothsides-ism’ që i trajton masat serbe si grumbullimi i forcave ushtarake përgjatë kufirit të Kosovës në të njëjtën kategori si Kosova që kërkon targa të ligjshme për makinat brenda territorit të saj. Ajo gjithashtu duhet të rindërtojë kredibilitetin e saj në Kosovë pas refuzimit të saj në vitin 2018 për të zbatuar liberalizimin e premtuar të vizave për qytetarët e Kosovës. Thënë kjo, unë kam besim në aftësinë e diplomatëve të BE-së për të zhvilluar zgjidhje kreative për problemet e nyjëzuara”, ka thënë Delawie.

Delawie ka thënë se elementi kyç për një marrëveshje për një paqe të qëndrueshme, është që Kosova të bëhet anëtare e Kombeve të Bashkuara, “gjë që do t’i lejojë asaj të marrë pjesë në të gjitha institucionet kyçe shumëpalëshe politike, të sigurisë dhe ekonomike në të njëjtën bazë si çdo vend tjetër në botë”.

Për Asociacionin, Delawie në një intervistë për Albanian Post ka thënë se është thelbësore që të mos kapet nga qeveria serbe.

“Sa i përket Asociacionit të Komunave me Shumicë Serbe, do të jetë thelbësore të sigurohet që ai të mos kapet nga qeveria serbe në të njëjtën mënyrë që Serbia ka marrë vendet e caktuara nga serbët e Kosovës në Kuvendin e Kosovës”, ka deklaruar Delawie.