Ish-fotoreporteri i New York Times, Wade Goddard, e shkrepi një nga fotografitë më të dhimbshme të luftës së fundit në Kosovë. Ky i fundit, fotografoi trupin e pajetë të 7 vjeçares, Donjeta Deliu, pak orë pasi u vra nga forcat serbe. Për herë të parë për Tëvë1, Wade Goddard, ka rrëfyer për momentet kur e shkrepi këtë fotografi dhe për qëndrimin e tij në Kosovë.

23 anëtarë të familjes Deliu nga Abria e Drenasit u vranë e u masakruan nga forcat serbe 25- vjet më parë.

E në mesin e tyre, ishte edhe Donjeta Deliu, vetëm 7 vjeçare.

Ajo kishte mbetur e shtrirë në vendin e njohur si “Zabeli i Rrajve”.

Ky moment u kap në fotografi, nga ish-fotoreporteri i New York Times, Wade Goddard.

E pak minuta pasi e shkrepi këtë fotografi, Wade Goddard, thotë se për një kohë u ul në heshtje.

“Gjatë qëndrimit aty i bëra disa fotografi dhe në një prej tyre shihet një vajzë e vogël që qëndron e shtrirë teksa pret që edhe trupi i motrës saj të vogël të vendoset në bartësen e drurit afër saj para se t’i largonin nga aty. Isha i tmerruar nga brutaliteti dhe të tregohem i sinqertë, më nuk mund të bëja fotografi. Kam parë shumë të vrarë më parë, por këtë herë isha i trishtuar. U ula në heshtje dhe ishte e vështira ta merrja kamerën dhe të bëja prapë fotografi. Kjo ishte dita më e rëndë për mua gjatë qëndrimit në Kosovë”, shprehet ai për Tëvë1.

Goddard, si fotoreporter mori pjesë edhe në luftën e Kroacisë dhe Bosnje Hercegovinës.

Por, kjo ditë në Kosovë, thotë se ishte një nga ditët më të rënda në jetën e tij.

“Kur arritëm në vendngjarje pamë disa njerëz teksa bartnin kufomat nga fusha pranë fshatit. Ata formuan bartës prej druri që t’i bartnin kufomat. Ne ecëm përgjatë pyllit dhe pamë një tendë ku kishin qëndruar të vrarët. Një foshnje ishte qëlluar në kokë. Ishte një moment i tmerrshëm t’i shihje fëmijët e vogël që ishin përpjekur të largohesh përmes pyllit, teksa ishin përndjekur nga njerëz të armatosur që qëllonin mbi ta”, tha Goddard.

Wade Goddard, qëndroi në Kosovë deri pas përfundimit të luftës.

Ndërsa në fillimet e saj, thotë se e takoi, edhe vet komandantin legjendar, Adem Jasharin.

“Unë erdha në Kosovë në shkurtin e vitit 1998 dhe në terrenin e parë në Kosovë si gazetar e takova Adem Jasharin, pastaj pas disa muajve e takova përsëri, por tani nën një strehë dhe i qëlluar me shumë plumba, së bashku me familjen e tij të gjerë”, shprehet fotografi i i New York Times

Në këtë masakër, u vra edhe motra e Donjetës, Gentijana, vetëm 8 vjecare.

Ndërsa në mesin e të vrarëve, është edhe foshnja 6 javëshe, Diturie Deliu.