Ish-gjykatësi amerikan i EULEX-it, Dean Pineles, në një intervistë ekskluzive për tëvë1 ka komentuar zhvillimet e fundit mbi Gjykatën Speciale.

Ai mes tjerash thotë se në këtë proces është e vështirë t’i thuash popullit shqiptar se po gjykohen vetëm individët dhe jo Ushtria Çlirimtare e Kosovës.

Me 3 prill filloi gjykimi ndaj katër ish-krerëve të Ushtrisë Çlirimtare të Kosovës, të cilët po akuzohen nga Zyra e Prokurorit të Specializuar në Hagë për krime lufte dhe krime kundër njerëzimit.

Por në aktakuzë nuk përfshihen pretendimet e raportit 27- faqesh të ish-senatorit zviceran Dick Marty, se në Kosovë ka pasur trafikim organesh.

Ndërsa ish-gjykatësi amerikan i EULEX-it, Dean Pineles, thotë se nëse nuk do të ishin këto pretendime për trafikim organesh, me shumë gjasë Gjykata Speciale nuk do të formohej.

“Është diskutuar shumë gjatë për çështjen e trafikimit të organeve, duke filluar nga ish-kryeprokurorja e Gjykatës Penale Ndërkombëtare për ish-Jugosllavinë, Carla Del Ponte, e deri tek ish-prokurori shtetëror zviceran, Dick Marty dhe Clint Williamson.

Por tani siç edhe mund ta shihni, në aktakuzë nuk përfshihet trafikimi i organeve. Tash kjo çështje i takon vetëm historisë e jo procesit gjyqësor. Po të ishte ditur që në fillim se nuk ka pasur trafikim të organeve kjo gjykatë me shumë gjasë nuk do të ekzistonte”, ka thënë për Tëvë 1, Dean Pineles.

Gjykatësi i krimeve të luftës, vlerëson se është shumë e vështirë të thuhet se në këtë proces po gjykohen vetëm individët dhe jo Ushtria Çlirimtare e Kosovës .

“Nga Dhomat e Specializuara e kanë përsëritur vazhdimisht se po gjykohen vetëm individët e jo Ushtria Çlirimtare e Kosovës, por unë e kam vështirë ta bëjë dallimin.

Vënia në gjyq e 4 komandantëve të UÇK-së e më pas të thuash se nuk po gjykohet organizimi gueril i tyre është e vështirë për t’ia shitur opinionit shqiptar. Unë mendoj se shqiptarët po e shohin se këtu po gjykohet Ushtria Çlirimtare e Kosovës”, thotw ai.

Ai tutje është shprehur i befasuar që prokurorisë do t’i duhen mbi 6 vjet për të paraqitur provat kundër ish-krerëve të UÇK-së.

Sipas tij kjo është një periudhe jashtëzakonisht e gjatë dhe se gjeneratat e reja mund ta shohin me ndryshe historinë e Kosovës.

“Gjykimi pritet të jetë i gjatë rreth 6 vjet, që për mua është jashtëzakonshme. Gjatë kësaj periudhe kohore do të vijnë gjenerata të reja që mund ta shohin historinë më ndryshe.

Prandaj e kuptoj shumë mirë dëshpërimin që ka populli i Kosovës. Ata kanë të drejtë të mendojnë se kjo gjykatë është e anshme duke pasur parasysh që në Serbi nuk po ndiqen kriminelet e luftës gjatë kësaj periudhe. Duhet ta pranojmë të vërtetën se ishin kriminelet serbë autorët kryesor të kësaj lufte”, shprehet Pineles.

Që te katër ish-krerët e Ushtrisë Çlirimtare të Kosovës, Hashim Thaçi, Rexhep Selimi, Jakup Krasniqi dhe Kadri Veseli janë deklaruar të pafajshëm lidhur me akuzat që rëndojnë mbi ta.