Ish-komandanti i Brigadës 138 “Agim Ramadani”, njëkohësisht deputet i PDK-së, Hisen Berisha, pasi ka bërë homazhe në kompleksin memorial në Koshare, me rastin e 24-vjetorit të Betejës së Koshares, u ka bërë thirrje qytetarëve të Kosovës që ta nderojnë dhe respektojnë vlerat e luftës.

Ai është shprehur se qytetarët duhet të solidarizohen me krerët e UÇK-së që po mbahen në Hagë, të cilët po mbrojnë vlerat, që siç ka thënë qëndrojnë në themelet e lirisë dhe shtetit të Kosovës.

“Është ditë që sublimon angazhimet dhe përkushtimet e të gjithë kombit shqiptar që një ditë të arrijmë bashkimin. Çdo ditë e punës në shtetndërtim do të jetë në vazhdimin e angazhimeve për të bashkuar kombin shqiptar me vlerat që na lidhin bashkë… Çdo përvjetor shohim fizionominë tipike të Koshares, duhet të ketë borë, të ketë reshje, të jetë ftohtë, njerëzit janë entuziastë, pavarësisht kohës, të hareshëm, sepse vinë, takohen dhe nderojnë këta që kanë rënë dhe prehen këtu në themelet e lirisë së shtetit. Kjo duhet të jetë ditë përmes të cilës iu bëjmë thirrje qytetarëve të Kosovës që t’i nderojnë dhe t’i respektojnë vlerat e luftës, të jenë të solidarizuar me ata që sot po përballen në Hagë, që janë duke mbrojtur pikërisht këto vlera që qëndrojnë në themelet e shtetit dhe lirisë së Kosovës”, ka thënë Berisha për “Ksp”.

Beteja e Koshares, më 9 prill 1999, në kuadër të operacionit “Shigjeta”, ishte njëra ndër më të përgjakshmet dhe më heroiket e luftës së Ushtrisë Çlirimtare të Kosovës. Thyerja e kufirit në mes të Kosovës dhe Shqipërisë kishte shënuar jo vetëm një fitore morale për UÇK-në, por ajo i kishte hapur rrugë furnizimit me armatim dhe mbështetje logjistike për shumë zona të luftës në brendësi të Kosovës.