Kryetari i Komunës së Skenderajt, Bekim Jashari, i shoqëruar edhe nga kryetari i Komunës së Drenasit, Ramiz Lladrovci, kanë pritur të hënën në Kompleksin Memorial “Adem Jashari” në Prekaz, ish-kongresistin amerikan, Jerry Weller.

Ish-kongresisti ka bërë homazhe te varri i komandantit Legjendar të Ushtrisë Çlirimtare të Kosovës, Adem Jashari dhe të rënëve tjerë të në kompleks.

Më pas, ata kanë vizituar edhe hapësirat e kullës së rezistencës të familjes Jashari, ku ciceroni zyrtar i ka rrëfyer Wellerit luftën e 5, 6 dhe 7 marsit të vitit 1998.

Para se të largohej nga Prekazi, ish-kongresisti ka vizituar edhe Muzeun në Kompleksin Memorial “Adem Jashari”, ku kryetari Bekim Jashari i ka dhuruar mikut amerikan një libër historie për luftën e Jasharëve, në gjuhën angleze.

/Epoka e re/