Një gjykatë në Tbilisi e ka shpallur fajtor ish-presidentin e burgosur të Gjeorgjisë Mikheil Saakashvili për kalim të paligjshëm të kufirit dhe e dënoi atë me katër vjet e gjashtë muaj burg shtesë.

Meqenëse Saakashvili ishte dënuar tashmë me nëntë vjet në rastet e mëparshme, një gjykatës në Gjykatën e Qytetit Tbilisi vendosi që ish-presidenti tani do të vuajë gjithsej 12 vjet e gjashtë muaj pas hekurave.

Sipas këtij vendimi, Saakashvili do të qëndrojë në burg deri më 1 prill 2034.

Duke folur nëpërmjet një lidhjeje video nga klinika Vivamedi në Tbilisi gjatë një gjyqi të veçantë, Saakashvili dënoi ashpër vendimin.

“Ky aktgjykim ka për qëllim që të më shkatërrojë në burg, të më eliminojë fizikisht”, tha ai.

Ai deklaroi se ende përbën një kërcënim për kundërshtarët e tij politikë.

“Nuk mund të shkatërrosh idenë e një Gjeorgjie të lirë apo shpirtin e Saakashvilit. Ne po luftojmë dhe do të fitojmë”, deklaroi ish-presidenti.

Saakashvili kërkohej nga autoritetet gjeorgjiane dhe u kthye fshehurazi në Gjeorgji më 29 shtator 2021, pas vitesh mërgimi të vetë-imponuar. Dy ditë më vonë, më 1 tetor, ai u arrestua. Prokurorët e akuzojnë për kalim të paligjshëm të kufirit.

Javën e kaluar, një gjyqtar në Gjykatën e Qytetit Tbilisi e dënoi Saakashvilin me nëntë vjet burg shtesë për përvetësim në shkallë të gjerë të fondeve publike. Gjyqtari vendosi që dënimi të ekzekutohej njëkohësisht me dënimin me gjashtë vjet burg që Saakashvili po vuante tashmë për shpërdorim detyre.

Saakashvili, president i Gjeorgjisë nga viti 2003 deri në 2013, ka mohuar vazhdimisht të gjitha akuzat.

Mohimi i tij i vendosur i fajit, i mbështetur nga partia opozitare Lëvizja e Bashkuar Kombëtare dhe disa grupe të tjera politike, ka fituar simpatinë dhe mbështetjen e shumë gjeorgjianëve. Shumë pretendojnë se ky rast ka qenë i motivuar nga hakmarrja politike.