Një grup i ish-të burgosurve politikë dhe bashkëveprimtarë kanë bërë homazhe te varri i veprimtarit Adem Demaçi në 6-vjetorin vdekjes së tij.

Në homazhe dhe nderim të veprës së tij, bashkëveprimtarët vendosën tufë lule mbi varrin e tij.

Adem Demaçi ishte njëri ndër veprimtarët më të shquar të cilët luftuan për kauzën kombëtare në kohën e Jugosllavisë.

Për angazhimin e tij politik, Adem Demaçi vuajti 28 vite me radhë në burgjet e Jugosllavisë. Pasi u lirua nga burgu, Demaçi vazhdoi aktivitetin e tij politik. Ai u quajt edhe Nelson Mandela i Evropës.

Adem Demaçi udhëhoqi Këshillin për të Drejtat dhe Liritë e Njeriut (KMDLNJ) nga viti 1990 deri në vitin 1995. Në vitin 1991 u nderua nga Parlamenti Evropian me Çmimin Saharov.

Gjatë periudhës 1998-1999, Demaçi ishte zëdhënës politik i UÇK-së. Ishte njëkohësisht kryetar i Lidhjes së Shkrimtarëve të Kosovës (2005-2007).

Adem Demaçi lindi më 26 shkurt 1936 në Prishtinë, ndërsa me prejardhje është nga Lupqi i Podujevës.

Veprimtarit të çështjes kombëtare, frymëmarrja iu ndal në moshën 82-vjeçare. Demaçi ka ndërruar jetë me 26 korrik të vitit 2018.