Gazetari i RTV Dukagjini, Dibran Istrefi në një linjë të drejtpërdrejtë nga Haga ka thënë se ekipa mbrojtëse e Jakup Krasniqit në një komunikim me gazetarë pa kamera, është shprehur e bindur se Jakup Krasniqi do të provohet si i pafajshëm në fund të këtij procesi.

Istrefi ka thënë se mbrojtja e Krasniqit ka thënë se gjatë tërë rrjedhës së procesit nuk janë paraqitur elemente apo dëshmi bindëse se e kanë provuar në çfarëdo forme fajësinë e Krasniqit.

Ai ka thënë se edhe mbrojtja e Kadri Veselit nuk ka fol para kamerave përveç mbrojtjes së Rexhep Selimit.

Të gjitha ekipet e mbrojtjes do të bëjnë një parashtrim përkatësisht kërkesë apo mocione për të rrëzuar disa pika të aktakuzës ose aktakuzën në tërësi. Një veprim i tillë pritet të mbahet pas datës 23 kur do të jetë seanca statusore.

Istrefi tutje ka thënë se ekipet mbrojtëse do të bëjnë parashtrimet për lirim të të akuzuarve dhe se një gjë e tillë do të ndodhë pas përfundimit të dëshmitarëve të prokurorisë.

Pas përfundimit të kohës dhe dëshmitarëve dhe provave të Prokurorisë, i mbetet ekipeve mbrojtëse për dëshmitarë se kush do të jenë dhe si në rrjedhë të kësaj procedure.

Disa ekipe mbrojtëse do të paraqesin disa dëshmitarë por se ekipi e Rexhep Selimit edhe mund të mos paraqet asnjë ka thënë Istrefi meqë barra e provës penale do ti bie prokurorisë dhe ajo do të duhej të provonte fajësinë.