Ka ardhur koha që diplomacia të hapë rrugën për paqen mes Rusisë dhe Ukrainës, ka thënë të mërkurën ministri i Mbrojtjes i Italisë, duke shtuar se mbështetja e fortë perëndimore për Kievin ishte vendimtare për të siguruar negociata serioze.

Guido Crosetto i ka thënë parlamentit se kundërofensiva ukrainase e vitit 2023 nuk kishte prodhuar rezultatin e dëshiruar dhe situata ushtarake duhej parë me realizëm.

“Nga ky këndvështrim duket se ka ardhur koha për diplomaci të thellë, krahas mbështetjes ushtarake, sepse ka një sërë sinjalesh të rëndësishme që vijnë nga të dyja palët”, ka thënë Crosetto.

Ai ka thënë se Rusia po tregon në mënyrë progresive gatishmëri për të negociuar dhe mbrojtur ekonominë e saj, ndërsa qëndrimi i Ukrainës duket më pak pa kompromis se më parë.

“E gjithë kjo duhet të merret parasysh në rrugën drejt negociatave për të ndalur konfliktin dhe procesin e mëvonshëm të normalizimit të marrëdhënieve, jo vetëm të Rusisë me Ukrainën, por edhe me vendet perëndimore”, ka thënë ai.

Rusia ka thënë se është gati për bisedime paqeje nëse Ukraina merr parasysh “realitetet e reja”, duke sugjeruar një pranim se Rusia kontrollon rreth 17.5 për qind të territorit ukrainas, shkruan “Reuters”.