Zyrtarët italianë që përdorin anglishten apo gjuhë të tjera të huaja në komunikime zyrtare mund të përballen me gjoba deri në 100 mijë euro.

Kështu thuhet në projektligjin e ri të prezantuar nga Partia “Vëllezërit e Italisë”, të kryeministres Giorgia Meloni.

Projektligji pritet të ndalojë të gjitha gjuhët e huaja, por duket se fokusi është më shumë te përdorimi i fjalëve në anglisht.

Në draft thuhet se “përdorimi i kësaj gjuhe turpëron dhe ofendon gjuhen italiane,” dhe se situata përkeqësohet edhe më tej prej faktit që Britania e Madhe nuk është pjesë e Bashkimit Europian.

Projektligji, i cili ende nuk ka dalë për debat parlamentar, kërkon që kushdo që mban një detyrë në administratën publike të ketë “njohuri me shkrim dhe të folur të gjuhës italiane”.