Izraeli është zotuar se do ta eliminojë Yahya Sinwar, udhëheqësin e ri të Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.

Sinwar besohet se ishte arkitekti i sulmit të 7 tetorit në Izrael, që nxiti luftën në Gaza.

Emërimi i Sinwarit në krye të Hamasit ka ardhur pasi javën e kaluar, në Teheran është vrarë shefi politik i grupit, Ismail Haniyeh.

Irani ka fajësuar Izraelin për vrasjen dhe është zotuar se do të kundërpërgjigjet. Izraeli nuk ka marrë përgjegjësinë për vrasjen e Haniyehut.

Duke folur gjatë vizitës në një bazë ushtarake, kryeministri izraelit, Benjamin Netayahu, ka thënë se Izraeli është “i vendosur” që ta mbrojë veten. “Ne jemi të përgatitur si në aspektin mbrojtës, ashtu edhe në atë sulmues”, u ka thënë ai rekrutëve të rinj.

Shefi i ushtrisë, gjenerallejtënant Herzi Halevi është zotuar se “do ta gjejmë atë (Sinwarin) dhe do ta sulmojmë”. Ai ka thënë se Izraeli do ta detyrojë Hamasin që të gjejë një zëvendësues për Yahya Sinwarin.

Sinwar, lider i Hamasit në Gazë që nga viti 2017  nuk është parë që nga sulmi i 7 tetorit, që është sulmi më vdekjeprurës në historinë e Izraelit.

Sekretari amerikan i Shtetit, Antony Blinken, ka deklaruar se është në dorën e Sinwarit që të ndihmojë në arritjen e armëpushimit, duke theksuar se ai ka qenë dhe vazhdon të jetë personi kryesor që merr vendime në grupin radikal.

Ndërsa analistët kanë thënë se Sinwar mund të jetë më hezitues që të pajtohet për një armëpushim në Gazë dhe është më i afërt me Teheranin sesa Haniyehu.

Lufta në Gaza ka nisur pasi Hamasi ka vrarë në veri të Izraelit afër 1 200 persona dhe rrëmbeu afër 250 të tjerë. Izraeli është kundërpërgjigjur me një ofensivë ajrore, tokësore dhe detare, që deri më tani ka lënë të vrarë pothuajse 40 mijë  persona, teksa palestinezët në Gaza po përballet edhe me një krizë të thellë humanitare.