Me ftesë të kryeministrit në detyrë të Republikës së Kosovës, Albin Kurti është mbajtur të hënën tryeza me përfaqësues të institucioneve dhe subjekteve politike për menaxhimin e pandemisë me COVID-19.

Ftesës për pjesëmarrje në këtë tryezë iu përgjigjën kryetarja e Kuvendit të Kosovës, Vjosa Osmani, si dhe nënkryetari i Kuvendit të Kosovës, Memli Krasnqi. Në këtë tryezë, prezentë kanë qenë edhe ministri i Shëndetësisë në detyrë, Arben Vitia dhe zëvendësministri i Financave dhe Transfereve në detyrë, Ilir Aliu.

Kryeministri në detyrë, Albin Kurti, në fjalën e tij hapëse ka prezantuar situatën aktuale me COVID-19 në Kosovë dhe masat që i ka marrë Qeveria e Kosovës deri më tash për ta menaxhuar këtë situatë.

Ai i ka njoftuar të pranishmit se në biseda telefonike me kryetarët e të gjitha komunave në Kosovë janë vlerësuar të gjitha nevojat që ato i kanë, e më pas ai edhe i ka vizituar deri më tash 15 prej tyre, që të njoftohet më për së afërmi me situatën në terren.

Po ashtu ka treguar se janë organizuar katër tryeza me ambasadorë ku janë shqyrtuar mundësitë e bashkëpunimit dhe ndihmës, është hapur llogari e veçantë në thesarin e Republikës së Kosovës për menaxhim me pandeminë e COVID-19, ku deri më tani janë mbledhur rreth 400 mijë euro, derisa vlera e ndihmës së marrë deri tash nga organizatat dhe shtetet e huaja ka arritur në 341 milionë euro.

Më tutje, Kurti ka shpjeguar se masat në fuqi janë marrë nga Ministria e Shëndetësisë me rekomandim të epidemiologëve dhe IKShPK-së dhe do të jenë në fuqi deri më 4 maj, me ç’rast do të rishqyrtohet situata.

Ndërsa kryetarja e Kuvendit të Kosovës, Vjosa Osmani, ka thënë se nga takimet e saj me kryetarë të komunave vërehet një brengë rreth ndaljes së projekteve kapitale, sidomos atyre të furnizimit me ujë, duke e pasur parasysh se sa e rëndësishme është higjiena personale në këtë situatë.

Kurse sa i përket kredive nga organizmat ndërkombëtarë financiarë dhe nga shtetet individuale, ajo shprehu gatishmërinë e Kuvendit që të japë garancinë politike që kreditë dhe ndihmat të realizohen.

Ajo ka folur edhe për tri nismat legjislative që janë në procedurë të Kuvendit, dy të propozuara nga grupi parlamentar i PDK-së dhe e treta që derivon drejtpërdrejtë nga aktgjykimi i Gjykatës Kushtetuese për kufizimin e lëvizjes, në mënyrë që mos të ketë probleme të natyrës juridike për të ndërmarrë masat.

Osmani ka theksuar se si institucion janë munduar të jenë sa më bashkëpunues me Qeverinë e Kosovës për menaxhimin më të mirë të situatës.

Në anën tjetër, nënkryetari i Kuvendit të Kosovës, njëherësh përfaqësues i PDK-së në këtë takim, Memli Krasniqi, ka thënë se vet prezenca e tij në këtë takim tregon për përkushtimin e PDK-së për t’i tejkaluar interesat partiake për çështjen me rëndësi për vendin.

Ai e quajti këtë ftesë të vonuar, ndërsa ka shfaqur pakënaqësinë se iniciativat e PDK-së lidhur me menaxhimin e pandemisë deri më tash nuk janë marrë parasysh nga Qeveria, me theks të veçantë te masat për kufizim të lëvizjes dhe pakoja financiare. Megjithatë, ai ka  theksuar gatishmërinë e partisë së tij për të kontribuar, me përgjegjësinë si partia më e madhe opozitare. Ai ka bërë thirrje që së bashku, pa dallime e në interes të qytetarëve, në Kuvend të hartohet një projekt ekonomik për ta kaluar këtë situatë.

Në fund kryeministri në detyrë Kurti, ka theksuar edhe një herë gatishmërinë sikurse edhe nevojën për bashkëpunim ndërinstitucional me qëllim të menaxhimit të situatës së krijuar me COVID-19. “Kjo është sfidë e përbashkët, përtej çdo mospajtimi politik, prandaj edhe përpjekja duhet të jetë e përbashkët”, citohet të këtë thënë Kurti.