Ja pesë arsyet pse Bayerni beson te kualifikimi
Pas humbjes 1-0 në ndeshjen e parë në çerekfinalet e Ligës së Kampionëve, Bayerni kërkon përmbysjen e madhe: “Jam i sigurt se do të tregojmë një fytyrë tjetër në ndeshjen e dytë”, tha Joshua Kimish disa ditë më parë.
Faktet dhe shifrat i japin shpresë skuadrës gjermane për të shkuar në gjysmëfinale, edhe pse i pret një mbrëmje jo e qetë në Munchen përballë 75 mijë tifozëve të tyre që presin shumë nga skuadra.
- BAYERNI, EKSPERT NË NDESHJE TË TILLA
Pas një humbjeje jashtë fushe në ndeshjen e parë të një raundi eliminator në Ligën e Kampionëve, Bayerni ka arritur të kualifikohet tri herë: në 2014/’15 në çerekfinale kundër Portos, në 2011/’12 në raundin e 16-të kundër Baselit dhe në 2006/’07 në fazën e 16-të kundër Real Madridit. Përveç kësaj, skuadra nga Munchen arriti të avanconte katër herë në Ligën e Kampionëve pas një humbjeje në ndeshjen e parë në një raund eliminator.
- GJERMANËT, TË FORTË NË EVROPË
Bayerni ka fituar 12 nga 13 ndeshjet e fundit në shtëpi në Ligën e Kampionëve. Në katër ndeshjet e sezonit aktual të “CL” në “Allianz Arena”, ka pasur gjithmonë fitore të qarta me të paktën tre gola diferencë. Vetëm në 2:3 kundër PSG-së në çerekfinale të sezonit të kaluar nuk pati asnjë fitore.
- VAZHDIMËSIA
Kanë kaluar më shumë se tri vjet që kur Bayerni nuk ka fituar disa ndeshje radhazi në Ligën e Kampionëve! Hera e fundit që ndodhi ishte në 2018/’19 – atëherë ishin dy barazime dhe një humbje (kundër Ajax Amsterdamit dhe dy herë kundër Liverpulit). Dy humbjet e fundit radhazi ishin në prill të vitit 2017 në çerekfinale ndaj Real Madridit. Dy ndeshje radhazi në Ligën e Kampionëve pa gola nga gjermanët janë edhe më të gjata: së fundmi në gjysmëfinalen 2013/’14 kundër Real Madridit.
- “ALLIANZ”, FAT PËR LEVËN
Futbollistit më të mirë të FIFA-s, Robert Lewandowski, i pëlqen veçanërisht shënimi i golave në “Allianz Arena”. Në katër ndeshjet në shtëpi këtë sezon, Leva ka shënuar tetë nga 12 golat e tij në Ligën e Kampionëve. Duke përfshirë dy tregolësha dhe një dygolësh.
- PARAKALIMI I BARÇËS
Një fitore kundër Villarealit do të ishte suksesi i 159-të i Bayernit në Ligën e Kampionëve. Skuadra nga Munchen do të kalonte Barcelonën në këtë renditje dhe do të hidhej e vetme në vendin e dytë. Reali i Madridit mban vendin e parë për numrin e fitoreve në Evropë(172).
