Gjyqi për vdekjen e Maradonës: Prokurori shfaq foto tronditëse dhe akuzon mjekët për “vrasje me paramendim”

Një moment tronditës ka ndodhur gjatë gjyqit për vdekjen e Diego Maradonës, ku prokurori Patricio Ferrari ka shfaqur një fotografi të legjendës së futbollit menjëherë pas vdekjes së tij, duke ngritur akuza të rënda ndaj ekipit mjekësor që kujdesej për të.

“Kushdo që thotë se nuk e kuptoi gjendjen e Maradonës, po gënjen”

Në fjalën e tij përpara gjykatësve, prokurori ishte i ashpër ndaj shtatë profesionistëve të shëndetësisë, të cilët akuzohen për vrasje nga pakujdesia.

Ai shfaqi një foto të Maradonës me barkun tepër të fryrë, duke e përshkruar si një dëshmi të gjendjes së rënduar shëndetësore të tij, të cilën ekipi mjekësor e kishte neglizhuar.

“Kështu vdiq Maradona. Kushdo që ju thotë, të nderuar gjyqtarë, se nuk e kuptoi se çfarë po ndodhte me Diego-n, po ju gënjen në sy. Të gjithë ata që e panë ashtu, shtrirë në shtratin e tij, ditë para vdekjes, do të jenë duke gënjyer nëse thonë se nuk morën pjesë në një vrasje,” deklaroi Ferrari.

“E vërteta është një e drejtë – Maradona dhe populli argjentinas meritojnë drejtësi”

Prokurori theksoi se Maradona u trajtua në kushte të papërshtatshme shëndetësore në shtëpi, në vend që të dërgohej në spital, dhe akuzoi të pandehurit për dështimin e tyre profesional dhe etik.

“Ata morën përsipër me dëshirë këtë rol në kujdesin shëndetësor në shtëpi, por dështuan në mënyrë fatale për të përmbushur detyrat e tyre,” tha Ferrari, duke përfunduar me mesazhin:

“Sot, Diego Armando Maradona, fëmijët e tij, familja e tij dhe populli argjentinas meritojnë drejtësi.”

Një gjyq që mund të ndryshojë historinë

Ky proces gjyqësor, që po tërheq vëmendje globale, mund të sjellë dënime deri në 25 vjet burg për mjekët e akuzuar, nëse gjykata i shpall fajtorë për vrasje nga pakujdesia.

Gjyqi ndaj mjekëve të akuzuar për neglizhencë në vdekjen e Diego Maradonës

Një gjykatë në Argjentinë ka nisur të martën gjyqin ndaj shtatë profesionistëve të shëndetësisë, të akuzuar për neglizhencë në kujdesin mjekësor që çoi në vdekjen e legjendës së futbollit, Diego Maradona, në vitin 2020.

Maradona, i cili ndërroi jetë në moshën 60-vjeçare, pësoi arrest kardiak më 25 nëntor 2020, ndërsa ishte në një shtëpi private pranë Buenos Aires, ku po trajtohej nga një ekip mjekësor.

Akuza dhe dënimi i mundshëm

Gjyqi po drejtohet nga tre gjyqtarë, të cilët do të vendosin nëse ekipi mjekësor, përfshirë një neurokirurg, një psikiatre dhe disa anëtarë të stafit mjekësor, janë fajtorë për vrasje nga pakujdesia.

Sipas prokurorisë, ekipi mjekësor nuk i ka ofruar Maradonës kujdesin e duhur mjekësor, çka mund të ketë ndikuar në përkeqësimin e gjendjes së tij shëndetësore. Nëse shpallen fajtorë, të akuzuarit mund të përballen me deri në 25 vite burg.

Gjyqi pritet të zgjasë disa muaj dhe të tërheqë vëmendje të madhe në Argjentinë dhe botën e futbollit. /noa