Gjergj Dedaj ka vazhduar dëshminë e tij para Prokurorit të Specializuar pranë Gjykatës Speciale ku ka thënë se është distancuar nga deklarimet që i ka dërguar në Speciale në vitin e kaluar pasi sipas tij, ai i ka bërë në gjendje të rëndë emocionale.

Në pyetjen e prokurores lidhur me një dëshmi të tij në maj të vitit 2014.

“Prokurori ju pyet, kush ju tha juve të shkoni lart në mal, ju u përgjigjët: ‘Hashim Thaçi. ‘Ai më kishte kapur dorën, ma kishte shtrënguar dorën dhe më kishte thënë se kur të mbërrini në Prishtinë unë do të duhej të hiqja dorë nga funksioni i nënkryetarit të Parlamentit të Kosovës dhe nga posti i presidentit të Partisë Liberale të Kosovës. Unë i thash se nuk do të hiqja dorë nga asnjëri prej këtyre funksioneve dhe nuk hoqa dorë. Hashimi më tha edhe nëse je i lirë tani, ne mund të vrasim në Prishtinë, sepse i kemi njerëzit tanë në Prishtinë dhe ngjitëm malit’”, ka thënë prokurorja.

Dedaj ka thënë se ndoshta ka pasur hidhërim dhe deklarimet e tij i ka cilësuar si revanshuese dhe ekzagjëruese e të tepërta, shkruan “Paparaci”.

“Nuk më kujtohet dhe me Hashim Thaçin jemi përshëndetur burrnisht, jo si tani që përshëndeteshim në Covid, por jemi përshëndet si burrat me dorë, si duhet dhe tjetër nuk më kujtohet. Unë me këto deklarata që i kam dërguar vitin e kaluar jam distancuar komplet sepse kanë qenë deklarata të dhëna në gjendjen time të rëndë, në procesin e rivarrimeve, ndoshta kam pasur idhnim. Idhnime kam pasë shumë të mëdha, për ju të pabesueshme, ishalla kurrë nuk i përjetoni dhe ndoshta edhe revanshuese dhe ekzagjëruese, të tepërta dhe nga të gjithat jam distancuar dhe të më ktheni në këto ju vetëm po i hapni plagët e Kosovës dhe plagët e mia dhe po e pengoni procesin e pajtimit dhe të faljes”, ka thënë ai.