Dushan Janjiq nga Forumi për Marrëdhënie Etnike, ka deklaruar se në Kosovë kriza nuk do të zgjidhet shpejt, por do të vazhdojë për një kohë të gjatë.

“Gjëja më e rëndësishme për mbijetesën e paqes së paqëndrueshme është zgjidhja e problemeve të paraushtarakëve, krimit, lirisë së lëvizjes dhe lëvizjeve të njëanshme”, ka thënë Janjiqi, duke shtuar se është e nevojshme që në Kosovë të zhvillohen zgjedhje të reja me pjesëmarrjen e serbëve, për të normalizuar situatën.

Sa i përket zhvillimeve nga rundi i ri i dialogut mes Vuçiqit dhe Kurtit në Bruksel, Janjiqi ka thënë se pavarësisht deklarimeve të Borrell se ishte bërë një hap i madh drejt formimit të Asociacionit, gjërat nuk shkuan mirë.

“U prezantua udhërrëfyesi për kthimin e serbëve në institucione. Siç kemi dëgjuar nga presidenti Vuçiq, nuk është arritur marrëveshje për këtë, por ai është i gatshëm të ulet sërish me Kurtin pas tre-katër ditësh dhe të bisedojë. Por le të jemi të drejtpërdrejtë – po flasim se si të dalim nga vakuumi institucional dhe i sigurisë që u krijua kur Lista Serbe u largua nga institucionet”, ka thënë Janjiqi për televizionin “N1”.

Më tutje, ka theksuar se derisa po vazhdojnë bisedimet për kthimin e serbëve në institucionet gjyqësore dhe politike, po ndërrohen flamujt në stacione policore dhe po hapet ura.

“Hapja e urës ndërmjet Mitrovicës veriore dhe jugore ishte planifikuar edhe më parë, por nuk ishte koha e duhur. Ka një kuptim më simbolik dhe përkujtues të kohërave të tmerrshme”, ka thënë Janjiqi, duke shtuar se Vuçiqi dhe Kurti po ndjekin një politikë zvarritjeje si dhe se “të dy po blejnë kohë”.

Duke komentuar deklaratën e Kurtit se drafti i Asociacionit të komunave serbe është “kundër Kushtetutës së Kosovës”, ai ka thënë se kryeministri i Kosovës “po e sajon këtë”.

I pyetur se kur do të përfundojnë negociatat në mes të Beogradit dhe Prishtinës, ai me shaka ka komentuar se kur kanë filluar negociatat i ka pasur flokë të zeza, ndërsa tani është thinjur dhe se shpreson që kjo të mos ndodhë me përfaqësuesit e tanishëm.