Qeveria japoneze ka ndarë 100 milionë dollarë për t’i dalë në ndihmë Ukrainës, e cila po përballet me agresionin e pushtimit nga Rusia.

Kjo është një gatishmëri e autoriteteve japoneze që u përgjigjën përpjekjeve të Perëndimit për t’i dalë në ndihmë Ukrainës e cila që nga 24 shkurti është mobilizuar për t’u mbrojtur nga pushtimi i ushtrisë ruse.

Lajmin për këtë ndihmë e dha vet presidenti ukrainas, Volodomyr Zelensky përmes llogarisë së vet në “Twiter”.

“Bisedova me kryeministrin e Japonisë, Fumio Kishida. Faleminderit për mbështetjen e fortë për Ukrainën në luftën kundër agresionit. Japonia ndan 100 milionë dollarë për ndihmën e miratuar tashmë prej 100 milionë dollarësh, mbështet plotësisht sanksionet e ashpra kundër Rusisë. Faleminderit! Një koalicion i vërtetë global kundër luftës, funksionon”, ka shkruar ai.

Ndërsa kryeministri japonez po ashtu përmes llogarisë së vet në “Twitter” ka thënë se “Japonia deklaron mbështetje të vendosur për sovranitetin dhe integritetin territorial të Ukrainës dhe qëndron së bashku me qytetarët e Ukrainës, të cilët po bëjnë maksimumin për të ndërmarrë veprime për të mbrojtur atdheun dhe familjet e tyre”.