Kryetari i Komunës së Skenderajt, Bekim Jashari dhe ai i Drenasit, Ramiz Lladrovci, janë takuar me liderin e Bashkimit Demokratik për Integrim (BDI), Ali Ahmeti, me të cilin kanë biseduar për referendumin që do të mbahet më 30 shtator në Maaqedoni.

Jashari në llogarinë e vet në “Facebook” ka shkruar se shqiptarët duhet të votojnë pro referendumit për emrin e ri të Maqedonisë.

“Shqiptarë, qytetarë të Maqedonisë, dilni e votoni, zgjidhni rrugën e dritës, rrugën e përparimit, rrugën e shteteve që ruajnë dhe promovojnë vlerën e qytetarit pa dallim dhe të drejtat e tij, të vlerave të secilit komb, lirisë dhe historisë pa diskriminim”, ka shkruar Jashari.

Postimi i plotë i Jasharit:

Takimi me Aliun, çdo herë është për t’u mbajtur mend, së bashku me Ramizin dje e vizituam në shtëpinë e tij dhe bashkëbiseduam gjatë.

Sot, më shumë se kurrë, shqiptarët në Maqedoni por edhe gjithkund ku jetojnë, duhet të jenë të bashkuar, rreth ideve dhe interesave madhore për kombin.

Interes i tillë është anëtarësimi në NATO dhe anëtarësimi në BE i secilit shtet ku jetojnë shqiptarët, bashkim me vlerat dhe përkatësinë me botën demokratike perëndimore.

Shqiptarët duhet ta thonë qartë po në referendumin e 30 shtatorit. Këtë duhet ta bëni ju për veten Tuaj, familjen dhe kombin.

Po NATO-s, po BE-së. Secila votë juaja, ka vlerë, dilni votoni!

Nuk duhet humbur kohë, vonestarët i ndëshkon historia. Përkatësia jonë perëndimore është e vulosur nga mijëvjeçarët, e kemi thënë dje, e themi edhe sot, ne i takojmë me gjithçka Evropës dhe vlerave të saj.

Shqiptarë, qytetarë të Maqedonisë, dilni e votoni, zgjidhni rrugën e dritës, rrugën e përparimit, rrugën e shteteve që ruajnë dhe promovojnë vlerën e qytetarit pa dallim dhe të drejtat e tij, të vlerave të secilit komb, lirisë dhe historisë pa diskriminim.

Mos lejoni të kthehemi prapa, mos lejoni të bëhemi peng i mendësisë së huaj dhe kundër interesit tonë nacional.

Urojmë të keni sukses në Referendum, së bashku me të gjitha forcat përparimtare të Maqedonisë, fitojeni të sotmen dhe të ardhmen euro-atlantike!

Me nderime,

Bekim Jashari
Ramiz Lladrovci

/Epoka e re/