Komandanti i Forcës së Sigurisë së Kosovës (FSK), Bashkim Jashari, ka pritur në takim në zëvendëskomandantin e Komandës së Forcave të Bashkuara në Napoli, Peter K. Scott.

Jashari e ka informuar Scottin mbi situatën e përgjithshme të sigurisë në rajon dhe në Republikën e Kosovës.

Sipas një postimi nga ana e FSK-së, Jashari gjithashtu e ka njoftuar Scottin për të arriturat e ushtrisë së Kosovës në harmoni me planin gjithëpërfshirës të tranzicionit.

“Gjithashtu Gjeneral Jashari e informoi atë mbi zhvillimin e kapaciteteve të FSK-së në fushat funksionale luftarake drejt arritjes së kapaciteteve të plota operacionale, në funksion të përmbushjes së misionit të FSK-së”.

“Po ashtu Gjeneral Jashari theksoi kontributin e FSK-së në arenën ndërkombëtare në ruajtjen e paqes dhe sigurisë duke përfshirë dislokimet e FSK-së jashtë vendit. Në takim u diskutua për mbështetjen e FSK-së për Ukrainën në linjë me objektivat e NATO-së dhe shteteve anëtare. Më specifikisht gjeneral Jashari e informoi gjeneralin Scott për kontributin e FSK-së në trajnimin e trupave të Ukrainës, për detyrat luftarake në operacionin ‘INTERFLEX’ dhe trajnimin e kontingjenteve të Ukrainës në EOD. Gjeneral Jashari shprehu gatishmërinë për rritjen e bashkëpunimin në mes të FSK-së dhe KFOR-it”, ka njoftuar FSK-ja.

Sipas këtij njoftimi, Scott e ka përgëzuar Jasharin për punën dhe angazhimin në ngritjen dhe avancimin profesional të FSK-së.

“Gjithashtu ai falënderoi gjeneral Jasharin për bashkëpunimin dhe konstruktivitetin për ruajtjen e paqes dhe sigurisë në Republikën e Kosovës. Në fund të takimit të dy gjeneralët u pajtuan që në të ardhmen të rrisin më tutje bashkëpunimin”, ka njoftuar FSK-ja.